Talía Teatro estrea Artur Ui, o ovo da serpe, a súa nova produción dirixida por Quico Cadaval a partir do clásico A resistible ascensión de Artur Ui de Bertolt Brecht. A estrea absoluta terá lugar os días 13 e 14 de marzo ás 20:30 h no Teatro Rosalía de Castro da Coruña, antes de iniciar unha xira por varias cidades galegas durante o mes de marzo.

Considerada unha das grandes sátiras políticas do teatro do século XX, a obra de Brecht relata o ascenso dun líder mafioso que conquista poder mediante a manipulación, a violencia e o medo. A historia funciona como unha parábola sobre como os autoritarismos poden medrar cando a sociedade os tolera ou mira para outro lado.

Nesta versión, Talía Teatro e Quico Cadaval desprazan o universo da obra cara ao Extremo Oriente, construíndo unha proposta estética que mestura elegancia e horror e incorpora referencias á cultura visual oriental contemporánea. O resultado é unha sátira política vibrante que combina humor, ironía e reflexión crítica.

O elenco está formado por Dani Trillo, Marta Lado, Toño Casais, María Ordóñez, Diego Rey, Marta Ríos, Xurxo Barcala e Artur Trillo, nun espectáculo de gran formato que implica a todo o equipo artístico da compañía.

Despois da estrea na Coruña, Artur Ui, o ovo da serpe poderá verse durante o mes de marzo en:

• 13 e 14 de marzo – A Coruña

• 20 de marzo – Vigo

• 21 de marzo – Cee

• 22 de marzo – Lugo

• 26 e 27 de marzo – Santiago de Compostela

A montaxe conta coa axuda á creación escénica da Axencia Galega das Industrias Culturais (AGADIC) na modalidade plurianual. 

Ademais, seguimos de xira cos espectáculos: Un deus salvaxe, Desexo, A parábola do angazo, Bicos con lingua, Voa, voa! e Rosa caramelo e outras historias.
Podedes consultar todas as datas no noso calendario.