Despois da súa estrea na Coruña e dunha intensa xira por Galicia, Artur Ui, o ovo da serpe regresa a Santiago de Compostela da man de Galicia Escena Pro, a feira profesional das artes escénicas de Galicia que se celebra do 25 ao 28 de maio na capital galega e que reúne compañías, programadores, distribuidores e profesionais do sector arredor da creación escénica galega.

A función terá lugar o 25 de maio ás 18:30 h e Talía Teatro será unha das compañías galegas seleccionadas para presentar o seu espectáculo diante de programadores e profesionais chegados de distintos puntos do territorio.

Tras as funcións realizadas en A Coruña, Vigo, Cee, Lugo, Santiago de Compostela, Ames , a compañía continúa a xira de Artur Ui, o ovo da serpe, unha montaxe que afonda nos mecanismos do poder, a manipulación e o avance dos autoritarismos.

Baseada na obra de Bertolt Brecht, considerada unha das grandes sátiras políticas do teatro do século XX, a montaxe relata o ascenso dun líder mafioso que conquista o poder mediante a violencia, o medo e a manipulación. A historia funciona como unha parábola sobre como os autoritarismos poden medrar cando a sociedade os tolera ou decide mirar para outro lado.

Nesta versión de Talía Teatro e Quico Cadaval, o universo da obra trasládase cara ao Extremo Oriente, construíndo unha proposta estética contemporánea que mestura elegancia visual, humor, ironía e tensión dramática. A produción incorpora referencias á cultura visual oriental contemporánea para crear unha experiencia escénica impactante e profundamente actual.

O elenco de Artur Ui, o ovo da serpe está formado por Dani Trillo, Marta Lado, Toño Casais, María Ordóñez, Diego Rey, Marta Ríos, Xurxo Barcala e Artur Trillo, nun espectáculo de gran formato que implica a todo o equipo artístico e técnico de Talía Teatro.

Con esta participación en Galicia Escena Pro, Talía Teatro continúa reforzando a presenza do teatro galego nos principais espazos profesionais das artes escénicas.